| Getting your Trinity Audio player ready... |
Perplexity денес го претстави Personal Computer – надградба на Perplexity Computer која се интегрира со локалните фајлови и апликации на Mac. Personal Computer беше најавен во март и беше достапен преку листа на чекање, а од денес официјално започнува со постепено пуштање за Max претплатниците.
Perplexity Computer беше лансиран претходно оваа година како „дигитален работник“ кој може да креира и извршува целосни работни процеси. Со денешната надградба, може директно да работи на Mac, со пристап до фајл системот и нативните апликации. Со притискање на двете Command копчиња на Mac се активира Personal Computer, кој одговара на текстуални или гласовни команди. Може да работи во било која Mac апликација, да ги „гледа“ активните апликации и автоматски да прикажува брзи акции.
Perplexity наведува дека Personal Computer може да работи на било кој Mac со macOS 14 Sonoma или понова верзија, но препорачува користење на Mac mini. Со Mac mini, Personal Computer може да работи 24/7, што е корисно за задачи кои бараат постојано активна машина или безбеден локален пристап до фајлови и апликации. Задачите можат да се иницираат и управуваат и преку iPhone додека сте во движење.
Personal Computer може да извршува задачи како: комплетирање на листа со обврски, средување на неорганизирана папка со преземања, споредување на локални фајлови со информации од интернет и многу повеќе. Исто така може да креира тимови од агенти користејќи повеќе од 20 напредни модели за извршување на задачи. Акциите на Personal Computer се видливи, па корисниците можат да интервенираат кога е потребно. Фајловите се креираат во безбеден sandbox, сите активности се проверливи и може да се поништат, а достапен е и „kill switch“.
Personal Computer за Mac започнува да се пушта од денес за Perplexity Max претплатниците, со приоритет за корисниците од листата на чекање. Perplexity Max чини 200 долари месечно, а новата функција не е достапна за Pro претплатниците кои плаќаат 20 долари месечно.
