| Getting your Trinity Audio player ready... |
Неговите песни, кои генерации ги доживуваа како лични приказни, вечерва добиваат нов, тажен контекст — како спомен на еден живот што ја обележа епохата
Со огромно жалење ја пренесуваме веста дека по кратко боледување, вечерва на една од скопските клиники, почина еден од најголемите македонски музичари, Владо Јаневски, на 66-годишна возраст.
Чаирскиот романтичар остави неизбришлива трага со неговите бројни хитови како „Ако не те сакам“, „Евергрин“, „Дома си е дома“, „И тогаш некоја будала“, „Некогаш и негде“, „Црно тиквешко“, „Ова е наше Скопје“, „Не зори зоро“, „Еден бакнеж“ и многу други.
Владо Јаневски е роден на 27 ноември, 1960 година во Скопје. Има издадено 6 студиски албуми и е првиот официјален претставник на Република Македонија на Изборот за песна на Евровизија со песната „Не зори зоро“ во Бирмингем, 1990 година. На годинешното издание на „Златна бубамара“ доби награда за трајни музички вредности.
Јаневски беше препознатлив по својот специфичен вокал и по баладите што станаа неизбришлив дел од македонската музичка историја. Со композиции што се слушаат со истата сила и денес, тој создаде наследство што ја надминува времето и трендовите.
Покрај како изведувач, тој беше и автор чиј потпис стои зад бројни хитови што ги изведуваа и други познати имиња, оставајќи зад себе богат музички опус кој ќе продолжи да живее и да се пренесува.
Веста за неговата смрт предизвика бран на тага кај публиката, колегите и сите љубители на македонската музика, кои вечерва се простуваат од човекот чиј глас беше дел од нивните најемотивни моменти.
Македонија се збогува со уметник, но неговата музика останува — како тивка, вечна трага што не избледува.
