Tинејџер од Оклахома стана првиот човек кој успеал да ја заврши до крај култната видеоигра „Тетрис“ на „Нинтендо“ дури 34 години по нејзиното објавување, пишува „Би-би-си“.
Вилис Гибсон објави видео на својот канал на Јутјуб од моментот кога го достигнува нивото 157, со што дојде до крајот на видеоиграта. По завршувањето на играта 13-годишникот паднал од столот и рекол: „Ќе се онесвестам, не ги чувствувам прстите“.
На Вилис му требале само 38 минути за да ја заврши видеоиграта. Неверојатно, до пред неколку години, играчите веруваа дека е можно да се игра само до ниво 29.
Популарната видеоигра каде играчите ги распоредуваат блоковите што паѓаат во совршени хоризонтални линии со сè поголема брзина првично беше создадена во 1984 година од советскиот инженер Алексеј Пајитнов, а се здоби со популарност по нејзиното деби на „Нинтендо“ и рачната конзола на „Нинтендо гејмбој“ во 1989 година. Денес, играта може да се игра на низа конзоли и платформи, вклучително и мобилни телефони.
Во 2010 година, професионалниот натпреварувачки гејмер Тор Акерлунд успеа да го достигне нивото 30 користејќи техника наречена „хипертапинг“, каде играчот ги вибрира прстите на начин што го движи контролорот побрзо од брзината во играта.
Ова доведе другите гејмери да усвојат други техники за да видат колку далеку можат да одат , но до минатиот месец, само вештачката интелигенција можеше да го достигне крајот на видеоиграта.
Инаку, тинејџерот вели дека ја игра оваа видеоигра од својата 11-та година и се натпреварувал на неколку турнири.
„Кога почнав да ја играм оваа игра, никогаш не очекував дека некогаш ќе ја завршам играта или ќе победам“, напиша тој на својот канал на Јутјуб.
Освен што ја заврши видеоиграта, Вилис вели дека го соборил и вкупниот резултат и три други светски рекорди на „Тетрис“. Други гејмери сега се обидуваат да ги надминат рекордите на 13-годишното момче, а многумина ги документираат нивните обиди на социјалните медиуми и веб-страниците за видео стриминг.
---------------------------------------------------- 
